Samtalen skal bidra til ein trygg og god start på skuleåret ved Nord-Gudbrandsdal vidaregåande skule.
Ein god start på vidaregåande
Alle elevar i Vg1-klasser og Vg2 yrkesfag får tilbod om ein kort og uformell samtale med kontaktlærar ved oppstarten av skuleåret. Her er det rom for å snakke om mål, forventningar, trivsel og eventuelle behov for tilrettelegging. Målet er å sikre at både elevar og føresette får ein best mogleg start på den nye kvardagen.
Praktisk informasjon
Oppstartssamtalane vert gjennomførte i klasserommet på Nord-Gudbrandsdal vidaregåande skule, Skansen 9 i Otta. Samtalane finn stad i veke 36 og 37, hausten 2025. Elev, føresette og kontaktlærar møtest til ei enkel og uformell prat for å skape eit godt grunnlag for resten av skuleåret.
Førebu dykk på samtalen
For å få best mogleg utbyte av oppstartssamtalen, er det viktig at både elevar og føresette set seg inn i nokre spørsmål på førehand:
Ønskjer og mål for utdanning og yrke
- Kvifor har du søkt dette utdanningsprogrammet?
- Er dette førstevalet ditt? Kva hadde du eventuelt som førsteval?
- Kva er grunnen til at du vil nettopp dette?
- Kva forventningar har du til vidaregåande?
Trivsel på ny skule
- Korleis synest du det er å starte på ny skule?
- Korleis opplever du miljøet i den nye klassen?
Tidlegare skuleerfaringar
- Kva opplevingar tek du med deg frå ungdomsskulen?
- Omtrent kor mykje tid brukte du på lekser?
- Er du kjend med fråværsreglane i vidaregåande opplæring?
Behov for tilrettelegging
- Er det noko du ønskjer at skulen skal ta spesielt omsyn til? (muntleg, skriftleg, fysisk, sosialt, allergi, tid)
- Treng du spesiell tilrettelegging i enkeltfag?
Fritidsaktivitetar og vener
- Kva brukar du fritida di til?
- Har du vener du er saman med på fritida?
Til føresette (for elevar under 18 år)
- Kva forventningar har du/de til tida på vidaregåande?
- Kva tenkjer du om rolla di som føresett i vidaregåande?
- Har de kjennskap til plattformene skulen brukar (Teams, heimesida til skulen, In School m.m.)?