Kva kan du gjere for å verne deg ved ei atomulykke?

Styresmaktene kan gi råd eller pålegg om tiltak som du bør følge ved ei eventuell atomulykke:

Hald deg innandørs

Lukk dører, vindauge og luftekanalar, steng av ventilasjonen. Varmepumper kan vere på.

Innandørsopphald vil normalt ha kort varigheit og ikkje utover to døgn. Innandørsopphald reduserer kor mykje stråling du blir utsett for. Det hindrar òg at du pustar inn radioaktiv forureining eller får det på kroppen.

Ta jod-tablettar berre dersom styresmaktene gir råd om det

Kjøp jod-tablettar på apoteket for lagring heime. Gjer dette før ei ulykke skjer, slik at du har dei tilgjengeleg.

Jod-tablettar skal du berre ta etter råd frå styresmaktene, og det vil berre vere nødvendig for barn under 18 år, vaksne 18–40 år, gravide og ammande. Tablettane vernar mot kreft i skjoldbruskkjertelen.

Dusj om du har fått radioaktiv forureining på deg

Vask deg med såpe utan å skrape opp huda. Bruk sjampo, men ikkje balsam som kan feste forureininga til håret.
Vask klede i maskina som normalt. Tørk av skoa med ei fuktig fille og kast filla etterpå. 

Følg kosthaldsråd

Styresmaktene kan gi råd om å unngå mat og drikke som ikkje er kontrollert av styresmaktene. Dette gjeld til dømes frukt og grønsaker frå eigen hage og vatn frå sisterne, og dessutan mat som du sankar sjølv som vilt, ferskvassfisk, sopp og bær.

Mat kjøpt i butikk og drikkevatn i springen er trygt.

Respekter føresegnene til styresmaktene om avsperringar, reinsing eller evakuering

Følg med på radio, tv eller internett for å få oppdatert informasjon om råda frå styresmaktene.

Les meir om råda på dsa.no/atomberedskap 
Kjelde: Direktoratet for strålevern og atomtryggleik (dsa.no)